Fotòs de l'article Estampar l'article Acuelh Barratz aquela fenèstra Estampar l'article Acuelh

« COQUINE » DINS LAS PRADAS AQUEST ESTIU A MONT PASIÈR

« Coquine » es una granda creatura ròsa que pòrta ben son nom. Es signada Leslie Bigelman, artista de New York que ven de s'installar a Mont Pasièr e que a la fèrma intencion de far bolegar las causas dins aquela legendària bastida. Amb Tony Crosbie, artista irlandés ferotjament estacat a la libertat d'expression que considèra coma lo ben lo mai preciós sus Tèrra, a fondat l'associacion « Obrir l'Art Contemporanèu » que presenta jusca al 31 d’agost de 2008 una vintena de escalpraduras audaciosas e vesiadas, plantadas coma tant de sentinèlas embelinairas a l’entorn de la citadèla medievala.

Leslie Bigelman e Tony Crosbie, coble d'artistas organisators de l'exposicion collectiva « En plein air », avián convidat lo 11 de julhet lo public a rencontrar los artistas, gràcia a una permenada tot a l’entorn de la bastida de Mont Pasièr. Cada artista a parlat de son òbra, e naturalament, lo contrari es arribat tanben. Aquelas comparasons entre creacions e creators an permés als permenaires d'entrar d’un biais mai secret dins lors diferents imaginaris, gràcia a un escambi simple e calorós.

Veiquí qualques prepaus capturats sus lo viu, coma de parpalhòls que fau viste tornar daissar :

« Sei mosaïsta e ai causit la calligrafia araba per la beutat, la poesia e l'estetica que prepausa. Aquela demarcha artistica e espirituala, aquò’s mon biais d'avançar dins la vita. Vivi ma passion, aquò’s una vertadièra terapia. »
Silvià Hénot « Elévation »

« Ai representat aicí la familha tala que los governaments vòlon que siá : encadenada per de besonhs materialistas creats de tota pèça per tot lo matracatge publicitari de la telé, d'ont la causida d’ aquela color aur que evòca lo clincant, l'inutil e aquelas cadenas que simbolisan aquel esclavagisme moderne. Per elevar los dròlles, fau lor apréner a aimar la gent puslèu que las causas. »
Tony Crosbie « La Famille ».

« Ai installat aquel banc talhat dins la massa d'un subrebèl castanhièr per que l'òm puescha se sietar e observar las òbras en fàcia. »
Felip Claudy « Sofa ».

« La mair, vòle ben, mas lo pair i es tanben per qualquaren. Ai escalprat aquel òme que pòrta son nenet en omenatge a un amic desaparegut que a belcòp patit de la non reconeissença de sa paternitat. »
Maurici Bonnand « Paternité ».

« Sei urós de rendre omenatge al petit patrimòni rural que representa aquel lavador gràcia a aquel personatge talhat dins la pèira de Paussac. »
Pèire Carcauzon « Le Témoin n° 180606 ».

« Aquela Venús representa las tres partidas de la femna que exprimon sas rondors, son costat carnal, sa feconditat : las ancas, lo ventre e las popas. Es aicí prèp de la Font d'Amor, un endrech predestinat. »
Fabiana Lormeau « Vénus ».

« Utilisi de materials simples, fèrre a beton, vielha tòla, plexiglàs, aicí per representar las escalas de l'existéncia : torcegudas, delicatas, malaisidas. Los personatges ensajan valha que valhe de s'arrapar e mai se al cap, aquò’s l'androna, degun zo sap. D’unes còps en cors de rota, arriban a se rencontrar. »
Joan Vindras « Figures Libres ».

Dempuèi la debuta d’aquel viatge, seguissèm la polida Elsà, vestida amb una brava rauba violina e calçada amb de « santiags » negres. Fai lo guide amb estrambòrd e bona imor. S’es associada al projèct de Leslie e Tony e lo pòrta amb glòria, s'exprimant al besonh en l'abséncia d'un artista :
« Aicí Aurelian Moser, musician, es intervengut lo mens possible sus una fusta de la maison que restaura per en desgatjar aquela femna gracila pausada non sens angoissa sus una balança per fin de se pesar. Aquò ditz belcòp de causa sus las femnas… d’unas se reconeissaràn. »
Elsà Martin, fotografa, al subjèct de « Femme » d'Aurélien Moser.

Sus aquò, una envolada en plena sciéncia-ficcion mandrada d'una bona dòsi d'imor fuguèt lo mai seriosament del monde declamada :
« Aquela pèça es eissida de las colleccions del Musèu Intergalactic de las Manipulacions Geneticas. En seguida a la granda invasion virala del 24èma milenari dont òm se soven enquera, aquel organisme geneticament modifiat es estat cultivat en camp d’esquarrissatge per rearsorbir la carn impròpria a la consomacion. Coma podètz zo veire, s'agís d'un bastard entre un voltor e la « dionée », planta carnivòra. »
Patricià Molins « Droséra ».

« Aquela vaca a demandat 300 oras de trabalh. Es estada realisada a l'ocasion d'una manifestacion organisada per la Crotz-Roja a Brajairac en 2002 titulada « Vachement solidaire ». Cadun podiá i pausar un messatge per dire sa revòlta fàcia a la misèria. »
Joan-Pèire Tauzia « Vache d'Enfer ».

« Ai fabricat « Coquine » en m'inspirant de mon amiga Valeria. » « Atal me veiquí tota nuda fàcia a vos, çò que descobrissi » sorís la Valeria en question.
« Au depart modèli una petita pèça puèi es enregistrada en 3D, agrandida e descopada per un robòt dins de polistirèna. Aprèp la cobrissi de jesmonita e de pintura. »
Leslia Bigelman « Coquine (Valérie) ».

« Sei terralhièr a Mont Pasièr. « Touche pas à ma fleur » associant de flors blancas e de flors negras, aquò’s plan segur una guinhada que cadun comprendrà. »
Estève Miglierina « Touche pas à ma fleur ».

« Ai causit de motius universals per acampar sus aquel objèct los quatre elements, l'aiga, la tèrra, lo fuòc, l'aire, e rendre omenatge a çò qu’es lo mai fragile e que fau a tot pèrdre aparar. »
Fred Soula « Totem des 4 éléments ».

Totas aquelas òbras e plan d'autras son a descobrir tot a l’entorn de Mont Pasièr, jusca al 31 d’agost que ven.

Sofia Cattoire

Copyright (c) Ferrassie-TV 2008 - 13/7/2008 Fotòs | Somari