COMA UNA POLSIÈRA D'ESTÈLAS GETADA AL FIAL DE L'AIGA

COMA UNA POLSIÈRA D'ESTÈLAS GETADA AL FIAL DE L'AIGA

Tres agachs frairenals entremesclats, los del pintre escrivan Francés Augiéras, del poèta Pau Placet e de Felip Pons, fotografe plastician, nos balhan a veire jusca al 5 de genièr al Pòl internacional de la Preïstòria de las Aisiás una relectura del dedins del paísatge, de la val de Vesèra al Sarladés, al fial de las sasons. Aquels imatges-poèmas expriman « de sentiments e visions extaticas e chamanicas fàcia als luòcs traversats », coma lo confisa suausament Felip Pons a la fola amicala que entora sa deambulacion al costat de Pau Placet, al mitan de lors creacions comunas. Lo moment es assuausat, en suspens, banhat pel solelh que totjorn dins aquel luòc nos brèça dins lo corridor dels àngels imaginat per l'arquitècte Rafèl Voinchet.

LAS ALAS DEL DESIR CAREÇAN LO PERIGÒRD en abrial sus FRANÇA 3 SUD OÈST

LAS ALAS DEL DESIR CAREÇAN LO PERIGÒRD
en abrial sus FRANÇA 3 SUD OÈST


Es un ausèl, una camerà sul front, l'autra sus lo ventre. Per tèrra, un pilòte experimentat recep son imatge frontal e pòt ental entrar dins las plumas de l'ausèl e « téner lo mangle ». La segonda, orientabla, filma çò que lo cap operator causís de cadrar dempuèi aquel punt de vista mai encara qu'aerian, celeste, volatile, capable de s'envolar coma una fusada, vironar coma una busa o se lançar coma un falcon sus sa preda, en un mot, capable de volar baujament dins lo grand bal dels ausèls. Laidonc, lo regard de l'espectator s'envòla, vibra, barbela jusca a la virason, de còps que i a.

LO DARRIÈR PAÍSAN PREÏSTORIAN Prèmi del Melhor Film per la Recèrca Creativa al Festenal ICRONOS de Bordèu

LO DARRIÈR PAÍSAN PREÏSTORIAN
Prèmi del Melhor Film per la Recèrca Creativa
al Festenal ICRONOS de Bordèu


Aprèp son avant-primièra al Pòl Internacional de la Preïstòria, renouvelat tres còps en rason de son succès, aprèp sa sortida nacionala gràcia a la revista Sciences et Avenir dins son numerò consacrat als breç de l’umanitat, aprèp èstre estat seleccionat per lo Festenal del Film d’Arqueologia d’Amiens e aver recebut la Mencion Especiala de la Jurada al Festenal Objectiu Preïstòria de Pech Merle, aquel film virat dins una bòrda e una cròsa del Perigòrd negre, LO DARRIÈR PAÍSAN PREÏSTORIAN de Sofia Cattoire, ven de daverar lo Prèmi de la Recèrca Creativa al Festenal ICRONOS de Bordèu, mentre que son succès dins las salas contunha d’entraïnar Gilbèrt Pémendrant, son eròi central, dins l'aventura la mai brava de sa vita.

LO DARRIÈR PAÍSAN PREÏSTORIAN Mencion especiala de la Jurada al festenal Objectiu Preïstòria de Pech Merle

LO DARRIÈR PAÍSAN PREÏSTORIAN
Mencion especiala de la Jurada al festenal Objectiu Preïstòria de Pech Merle


Del 5 al 7 de julhet 2012 se debanèt a Pech Merle dins Òlt lo prumièr Festenal del Film de Preïstòria. 45 films en competicion faguèron venir 1600 visitors dins lo Musèu de Preistòrïa amenatjat al dessús de la cròsa ondrada de Pech Merle. Una meravilha pintrada per nòstres aujòls aquò fai 25 000 ans onte se succèdon siloètas de femnas, bisons, mamots, cavals pigalhats e mans negativas. Lo succès d'aquela prumièra edicion atèsta de l'interès fòrt larjament partatjat per la recèrca de nòstras originas.

FIPA 2011, 24ena edicion

BERNIFAL DINS LAS SALAS E LOS FESTENALS
Eròi del film de sa realitat, lo Gilbèrt contunha sa virada

Coma caldriá far per gardar la suaudor d'aquels moments ? Las novèlas projeccions en salas e en festenals del film : LO DARRIÈR PAÍSAN PREÏSTORIAN an dobèrt las pòrtas d'una novèla dimension. La d'un film a mand de venir culte, amb una osmòsi e una armonia completas que se fan entre lo public, lo personatge e la botiòla de tendresa paísana e preïstorica que ondula sus l'ecran. Sus aquel camin de lutz al còr de las salas sornas, lo Gilbèrt Pémendrant, pastre de Bernifal, contunha son amontanhatge virtual. Aquò's sus la tela que son tropèl de mamots, d'auròcs e de cabras salvatjas l'acompanha, ufanós.

FIPA 2011, 24ena edicion

FIPA de Biarritz
24ena edicion
Una culida de films que nòstres dròlles podràn n’èstre fièrs

Los images de uèi son los archius de doman. Laidonc perqué pas daissar de marcas que ne’n serem fièrs ? Aquò’s aquela idèa que a manifèstament guidat lo filmatge de nombrós films e documentaris presentats aquesta annada al Festenal Internacional dels Programas Audiovisuals de Biarritz (FIPA), çò que a produch de films emplenats del coratge de dire e del dever d’esperar.

Fòl coma un imatge

Fòl coma un imatge

Préner çò que l'òm vei, quala folia ! Tots los cors d'optica m'explicaràn pas aquel poder magic que nos es acquesit. D’unas fotòs me fan plorar, en tot me consolar d'aver pogut salvar aquela part preciosa de la persona aimada, dins aquel endrech ont aviam caminat. La memòria sèrva e farga de sòmis, dins aquel autre monde onte m’es pro de levar los braç per m’envolar. La fotò es un raubadís sens dolor del bonaür partejat. Las de Jacme Saraben nos revèlan un òme atentiu, captiu de cada beluga.


Artistas, franconís crean, compausan e vivon en terra occitana.

fr  en