Photos de l'article Imprimer l'article Accueil Fermer cette fenêtre Imprimer l'article Accueil

« LO DARRIÈR PAÍSAN PREÏSTORIAN »
guerdonat al Festenal de Nyon (Soïssa)

Rei de La Fusta, sa bòrda, Senhor de Bernifal, sa cròsa ondrada, Gilbèrt Pémendrant, 77 printemps, ven de recebre las onors de la Jurada del Festenal Internacional del Film d'Arqueologia de Nyon, onte lo film que li a consacrat Sofia Cattoire "Lo Darrièr Paísan Preïstorian" es estat guerdonat per lo prèmi de la jurada materializat per un "oscar" talhat de man d'òme dins lo granit elvetic, una pura belòia. Tant pesuts, unics e litics fuguèron los prèmis balhats a Frederic Wibler e Saléha Gherdane per lor film "Crépuscule des civilisations : Angkor la civilisation engloutie", prèmi del melhor film d'arqueologia, a Iossif Pasternak per son film "Les secrets du trésor de Priam", prèmi especial de la jurada e prèmi del public e a David Geoffroy per son film "Quand les Gaulois perdaient la tête", prèmi del melhor film a tòca educativa. Sens oblidar las tres mencions especialas de la jurada balhadas a Pau Rambaud e Claude Delhaye per lor film "Une dame, des pierres, des hommes", a Rob Hope per son film "Descente : un passage à travers le temps" e a Ramond Collet per "Photographier l'invisible". Un brave palmarés mas al-delà d'aquelas distincions, una vertadièra comunautat de creators preocupats de tornar al public lor quista de sens e de coneissenças dins un monde qualque pauc amnesic quand tot va tròp aviat, un grop uman que lo mèstre mot es a contrario de prene lo temps, se l'apropriar per lo saborar, ensemble.



L'INVISIBLE E LO SILENCI, TANT ELOQUENTS !

Mostrar l'invisible e far parlar lo silenci en se basant sus de vestigis evocadors o prims, tal es lo grand desfís del film documentari istoric, coma l'a rapelat lo president de la jurada, Adolfo Conti, realizator e productor italian, lòrs de la ceremonia de clausura del festenal sus la scèna de l'Usine à Gaz, naut luòc cultural de la vila de Nyon situada entre Genève et Lausanne, sul bòrd del Lac Léman. De fach, la mission es complèxa, mas quala fantastica aventura ! Presenta en efièch, la possibilitat de desvolopar los tractaments en image los mai creatius en tot demorar al servici d'un apròchi umil e rigorós de nòstra Istòria, la que a daissat de traças escritas, mas tanben de nòstra Preïstòria, la que tòrna montar valentament lo cors de milions d'annadas cap a nòstre Grand Passat. Car es temptant de far dire a las descobèrtas çò que l'òm voldriá entendre, d'aprèp las modas, las ideologias o las cresenças del moment. Òr, per çò qu'es de l'arqueologia, s'agís pas de trobar çò que l'òm cèrca, mas ben de trobar çò que l'òm tròba, e de l'admetre. Se aquela quista tròba un tal resson en nosautres, aquò's, d'aprèp ieu, perque portam enquera dins nòstra memòria arcaïca de sovenirs de çò que fuguèrem, dempuèi las originas. Aquels sovenirs son una fòrça, una fieretat, un sòcle que nos permet de nos téner drech, de resistar e d'avançar.

"LO DARRIÈR PAÍSAN PREÏSTORIAN" GUERDONAT AL FESTENAL DE NYON

Fuguèt un immense onor d'èstre convidada a Nyon per recebre un prèmi per lo film "Lo Darrièr Paísan Preïstorian" virat entièrament en Perigòrd e devolut a restituir l'èime d'un país, d'un òme e la fòrça de son estacament a sas raices que gràcia a sos aujòls magdalenians li son estadas legadas jos fòrma d'una prodigiosa cròsa ondrada, la cròsa de Bernifal. L'acuèlh del public, dels membres de la jurada e de la còla del festenal bailejat per Cristòl Goumand fuguèt simple e arderós, qu'òm pòt pas oblidar. Coma realisatritz d'aquel film documentari, ai enòrmament presat aquela marca de reconeissença car per ieu, far de films sus la Preïstòria al travèrs de personatges prigondament connectats al Grand Passat, aquò's l'ocasion d'observar lo biais dont los òmes an saubut cambiar e s'adaptar a l'agrat de milions d'annadas. Es un messatge d'esper et de frairetat per çò que i a pertot sus aquela planèta de las gents formidables que nos reconcilian emb lo genre uman. E se volèm testimoniar del monde de uèi, per los arqueològs que escavaràn aquela quita Tèrra dins 20 000 ans, cal tanben testimoniar d'aquelas vitas, fachas de lumièra, de suausor e de partatge. Vos laissi çaí-dejós descobrir l'ensemble del Palmarés, totjorn motivat emb precision per la jurada qu'èra per aquela ochena edicion compausada de : Adolfo Conti, realizator e productor de films documentaris en Itàlia, Erige Sehiri, realizatritz e jornalista independanta en Tunisia, Felip Curdy, arqueològ, conservator del Musèu d'istòria del Vaais a Sion, Danís Weidman, arqueològ cantonal valdés e Maria Longhena, arqueològa americanista, directritz del festenal de Bologne "Storia del Passato". Per çò qu'es de l'aventura del Gilbèrt, eròi de sa realitat, vaquí las propchanas ocasions de lo rencontrar :

 

  • Serada CINÉ RENCONTRE al cinemà Lux del Boisson de Cadonh,
    dimenge 28 d'abrial a 8 oras e mièja del ser.

  • Nuèch del Film d'Arqueologia, Musèu e Centre de Recèrca de Bibracte, Morvan,
    dimècres 24 de julhet 2013.

  • Projeccion al Paléosite de Saint-Césaire, Charente Maritime,
    divendres 27 de setembre 2013.

 

I serai tanben.
Al plaser de vos i tornar trobar.

 

Sofia Cattoire

Revirada en occitan : Joan-Claudi Dugros

 

Siti internet del Festenal del film d'Arqueologia de Nyon :
http://www.mrn.ch/fr/festival/

 

Copyright © Ferrassie-TV 2013 - 29 mars 2013 Photos | Sommaire