Estampar l'article Somari Estampar l'article Somari

LO CAPITANI VASQUEZ AL CIMÈL DE SA FÒRMA

22 de octobre 2006 : Albuga - Santa fe : 24 a 17

Çò qu’èra previst arribèt : la victòria fuguèt dificila ! Çò que crenhiam, se faguèt pas totjorn : los de Santa Fe mandèron pas pro de juòc que lor auriá permés de l’emportar (mai que mai dins lo segond temps). Los pensavem jòines e jogaires, fuguèron sovent repotegaires e trichaires ! Mas coma aquò es pas dins lor caractèr – lo natural tòrna sovent al galaup – aluquèron lo fuòc sus tots los cantons del terrenh en far permenar lo balon entre totas lors mans e amb beucòp d’adreça. La resta del temps, patiguèron la lei del « pack » local, sobeiran dins los aires e devastator dins los gropats-penetrants, que l’un d’els traversèt tot lo terrenh ! Dos ensags sus penal-tòcas perfiechament negociadas, Vasquez (« Monsur 100% ») tornant rajustar la resta amb lo pè, an garnit lo planchòt costat local, e un subrebèl ensag costat visitor aprèp un temps de juòc que ne’n finissiá pas. Los tres-quarts, quant a els, teissèron una cledissa gaireben impenetrabla.

Albuga a una granda equipa a aquel niveu del rugbí amator, respectada e respectabla, e faudrà èstre fòrt per anar la quèrre. Mas la sason fai nonmàs que començar, e demòra enquera qualquas ajustas que faudrà préner seriosament.

En esperar, son totjorn prumièrs e invincits tant en campionat coma en copa ont son segurs d’acabar prumièrs que que se passe lòrs de la darrièra partida.

PLB


Vasquez - 1 oct 2006 - Photo Bertrand Picq
Fotòs Bertrand Picq - 1 de octobre 2006
Copyright (c) Ferrassie-TV 2006 Somari