|
120 ectaras jos l’aiga per crear un estanh en estat d’asagar los
camps de la vau de Dròt, aquò’s l’obratge d’art titanic
complit pels òmes a la riba de la Dordonha e de
Òlt e Garona, a la debuta de las annadas 90. Dempuèi lo paisatge
tira glòria del lac de Lescourou, dotat d’una diga, d’un pont e,
sus sa riba sauvatja, d’una resèrva naturala poblada de bernats pescaires. Aquel
aqüatic relarg es destinat a l’agricultura e non als lésers. Pr’aquò,
gràcia a l’obertura d’esperit dels elegits del País de Duràs e a la
fòrça de persuasion de la còla del comitat departamental d’esquí
nautic de la Dordonha, lo Babyski Torn a investit las ribas del lac,
costat Soumensac, amb la complicitat del cònsol Bernat Patissou, aquel
dissabte 12 de junh jos un cèl radiós.
Chatinglats pels esquís cauçats
torn a torn pels petits de 3 a 7 ans, las aigas del lac an agut lo
sorire tota la jornada, parièr coma lo public vengut nombrós per
profitar d’una brava jornada en familha, en armonisar natura e descobèrta.
Pres en carga per tota la còla calorosa del Babyski Torn, los
mainatges an viscut la brava aventura de la glissa sens lo mendre
dangièr. Ne’n son sortits fièrs e jaurèls, jos lo regard
esbalausit de lors parents. Lo solelh, la plaja, los crits de jòia dels
dròlles… Lescourou ofriguèt a tots de sovenirs inoblidables, lo temps
d’un dimenge al bòrd de l’aiga.
Òc, zo sabi, aquò èra un dissabte, mas francament bèl coma un dimenge.
Sofia Cattoire
|
