|
I a de l’afògament e de l’intensitat dins los grands uèlhs de Danièla Marjary quand
vos parla de çò que fait concrètament la Crotz-Roja uèi :
« Fau dedramatisar, fasèm de la solidaritat, pas la caritat ! »
E per tot dire, òm se sent còp sec a son aise au mitan de las pilas sonhosament
recaptadas – farda de maison, vestits òme, femna, dròlles, novèls nascuts – aquelas
diferentas seccions an investit, a Albuga, caduna de las pèças de l'anciana percepcion,
coma per un juste retorn de las causas :
« Aquò èra la percepcion, l'endrech onte l'òm portava l'argent. Aurá, òm lo
tòrna ! »
Laidonc, qual es au juste la batèsta d’aquela còla de femnas, raionantas e resolgudas,
que aculhisson lo public a braç druberts, aquel 8 març 2008, jornada de la femna
e de la primièra bradariá de l'annada del comitat d’Albuga de la Crotz-Roja Francesa ?
Danièla Marjary, la novèla presidenta, a pres lo temps de tot nos explicar.
|
QUALQU'UN VEN E AJUDAM
« Recebèm de dons e tornam vendre lo mai possible, a prètz plan bas :
1,50€ per tot vestit adulte, manca los mantèls doblats a 7€, los vestits dels dròlles
còstan de 50cts a 2€ de mai, los jorns de bradariá, òm brada plan segur ! Tot
vestit adulte passa a 1€ e tot vestit de dròlle a 50cts. Avèm tanben una seccion
farda de maison que los prètz van de 1 a 4€, e un depaus de mòbles amb especialament
de matalàs venduts de 5 a 10€. » En efèct, los prètz son imbatables. E puèi,
onte vai l'argent ? « Aquel argent nos permés de botar en accion nòstra
devisa fondatritz :
AJUDA A TOTA SOFRENÇA
En clar : de situacions dificilas nos son sinhaladas per los mèras, los medecins,
las assistantas socialas o de particulars. Drubèm un dorsièr e, en fonccion dels
revenguts, podèm installar una ajuda sus qualques mes. Aquò’s lo debanament abitual.
Mas dins los cas d'urgéncia, se qualqu'un ven e nos ditz : « Ai ren a
mijar » li fasèm fisança e li balham còp sec un còlis alimentari. Avèm tanben
una fonccion « vestiari » : per las personas que n’an besonh, balham
de vestits jos fòrma de bons, per fin que la persona puescha causir. Organisam una
bradariá tres còps l'an dins nòstre local, 2, carrièra de la Boetia a Albuga e participam
a diferents « voida granièrs » e al Téléthon. Asseguram una permanéncia en drubent
nòstre local cada dijòus e dissabte de 15h a 17h. Fau subretot en conclusion que
degun trantalhe de venir. Qualqu'un ven e ajudam, aquò’s al fons tot simplament
nòstra mission. »
Sofia Cattoire
Comité du Bugue de la Croix-Rouge Française :
- Fondé en 1947
- Premier président : Abel Montauriol
- Couvre les territoires des cantons de : Le Bugue, Saint-Cyprien, Belvès, Villefranche-du-Périgord,
Cadouin, Le Buisson, Saint-Alvère soit 65 communes qui regroupent 24300 habitants.
- Nombre d’adhérents 35
- Local : l’ancienne perception du Bugue, 2 rue de la Boétie.
- Ouverture : jeudi et samedi après-midi
de 15 h à 17 h
2 rue de la Boétie
24260 LE BUGUE
tel : 05 53 07 43 94
|
|
