|
Los carris florits d’un còp èra e lo carrosel accionat per lo caval de monsen Félis de la Cròpta, sens oblidar las pèras cuèitas servidas sus una fuelha de figuièr – d’aprèp lo Norbèrt Marty – son, de segur, pus aquí per far de la Sant-Loís lo país miraudiós que fasiá se desplaçar totas las campanhas per un vertadièr « dimenge de rire ». Manca de benevòles per fargar los carris, lo comitat d’animacion de Albuga, jos la direccion de Laurença Rebillon, a ‘gut l’idèia de voidar sus la vila quatre famosas fanfaras que se son relevadas per far dançar los passants, susprès e alègres. Martina Lacoste, presidenta del grope folclòric « Los Cordilhons d’Albuga », aviá quant a ela convidat « La Givaudine », grope folclòric del Berry. Los dos gropes assistiron a la messa, braves coma de santons, avant de traversar la vila au son de la cabreta e de l’acordeon. L’après-miegjorn, las doas tropas danceron jos lo mercat cobèrt emb lo rison a las pòtas e l’agach petejant qu’engendron lors danças de seduccion emplenadas de cortesia.
Atal a sa manièra la Sant-Loís 2006 fugèt relevada, exprimant la jòia de viure d’aquel Perigòrd occitan, enquera tot imprenhat de sa natura paísana e galòia.
Aquela Sant-Loís sirà estada la darrièra per lo Pair Bernard que ne’n celebret la messa. A causit de partir rejónher a Nantes son pair vièlh de 94 ans. Lo Pair Julien, que oficièt a sos costats aquelas sieis darrièras annadas, a per sa part decidit de rejónher la maison de retirada dels Pairs de sa congregacion – los Filhs de Maria Immaculada, en Vendée – per acompanhar un centre espiritual de sòrres, laïcas e religiosas. Lo Pair Bernard e lo Pair Julien, plan apreciats dau monde d’Albuga, an preferit partir dins la discrecion, daissant un simple messatge d’au reveire dins lo jornal « Ensemble » de la parròquia de Sant-Martin-sus-Vesèra. Aquò’s lo Pair Gérard Blanc que los remplaçará e será donc apelat a celebrar la Sant-Loís 2007.
|
