L'ESPÈR ES UNA MEMÒRIA QUE VÒL
Una taulejada balzaciana per la 25^na edicion del Téléthon

Lo Téléthon d’Aubàs e dels vilatges d'alentorn se debanèt en decembre 2011 per una bona partida dins lo castèl de Sauvebœuf, mes a la disposicion dels benevòls per Claudi e Florença Douce, mecènes istorics d'aquela nòble causa. Torneg de bridge, conferéncia de Gonzague Saint-Bris sus sa recenta biografia de Balzac e recital arpa e guitarra donat per lo groupe « Fingers crossed » an precedit una magnifica taulejada balzaciana imaginada per lo chefe Eric Boyard e sa tropa « Il pleut dans ma bouche » associant misa en boca e mesa en scèna. Un sopar dieusenc que reservèt als convidats una subrebèla suspresa a descobrir dins lo reportatge virat per Ferrassie TV per sosténer l'Associacion Francesa contra la Miopatia.

L'ART DEL MECENAT AL CASTÈL DE SAUVEBŒUF

« L'espèr es una memòria que vòl » escriviá Onorat de Balzac. L'espèr d'una vita melhora e d'una garison, sovenir dels temps inchalhents lonh de la malautiá, aquò's ben al servici d'aquò que trabalhan dempuèi 25 ans tots los benevòles del Téléthon. Dins lo canton de Montinhac, lo gropament d'associacions "En Quatre pour l'Espoir" se mobilisa dempuèi 18 ans dins la jòia e la fervor per recoltar totjorn mai de dons. I a la glòria de venir en ajuda e lo bonur de zo far tots amassa. I a tanben localament un atots màger, lo sosten de Claudi e Florença Douce, mecènes, que dubrisson lor castèl de Sauvebœuf e i fan venir d'artistas e de personalitats culturalas de natura a atraire lo monde. Aprèp l'actriça Milèna Demongeot, lo qüatuor dels frairs Capuçon, l'escrivana Cristiana Collanges e lo contaire Pèire Bellemare, aquest an lo Téléthon fuguèt plaçat jol signe de l'inventor del roman a episòdis, Onorat de Balzac. Gonzague Saint Bris autor de la biografia : "Balzac, une vie de roman" venguèt en efèct, balhar, al castèl de Sauveboeuf, una conferéncia remirabla. Afogat, inspirat, l’escrivan evòca « lo pichon dròlle pas plan brave que èra pas aimat de sa mamà mas que aviá consciéncia de son engenh ! ». Aquel que inventarà la nocion de personatges que tòrnan aparéisser e que en seguissent los 85 romans farà viure continualament 3 500 personatges.
Ne resultèt un vertadièr embelinament, un recital arpa e guitarra donat per Cecília Lencement e Stu Mac Murrough que fòrman lo duò "Fingers Crossed". De dets crosats, simbòl de l'enveja de tots, lòrs d'aquela serenada, de balhar astre a los que sofrisson dins lor carn en raison de malautiás neuròmusculàrias. E quala fuguèt laidonc la suspresa ? Aquò fuguèt l'envòl delicat e poderós tot a l'encòp, al bèl mitan de la joiosa taulejada, d'un pichon rossinhòl nommat Celina Victores-Benavente, sopranò, venguda cantar d'aires d’opereta subtils e faceciós. La bèla fuguèt ben lèu rejoncha per un duò dels pus langorós per Joan Goyetche, tenòr al timbre generós e encantaire, acompanhat al pianò per Joan-Francés Boyer. Aquels joves artistas, balhan un espectacle amb d’autres cantaires lirics tan mai de remèrca, cada fin de mes de julhet a Plasac e als alentorns lòrs del festenal "Più di Voce en Périgord". Un festenal organizat per Patric Magnée, que es tanben President del gropament d'associacions "En Quatre pour l'Espoir". Aquels cantaires balhèron un buf eminentament romantic a quel sopar dels pus rafinats, mes en boca e mes en scèna per lo chefe Eric Boyard e sa brigada "Il pleut dans ma bouche", amb la complicitat de la tropa "Aubas’Tringue". Coja transformadas en sopièras, jutas utilizadas en pòrta-calhas enastadas, purèia violeta a basa de patatas vitelotas contrastant amb de pesèus verds plan coma cal, cambajons que rostissián al dessús de brasas dins las chaminèias, tal fuguèt lor biais de cosinar los produchs del terraire en tot creant un univèrs pictural particular. Lo tot donava a l'endrech un aire de « Jardin de las Delícias », digne d'una tela del grand mèstre flamenc du XV^e siècle, Jiròni Bosch.
Entau cadun dins son domèni aguèt lo plaser d’ofrir son engenh per sosténer la recèrca medicala contra las miopatias. Fin finala, un còp enquera, Aubàs e son canton batan de recòrds per lo Sud Dordonha, puèi que son prèp de 25 500 euròs que seràn estats collectats gràcia a l'ensemble de las manifestacions organizadas.

Sophie Cattoire

Revirada en occitan : Joan-Claudi Dugros