www.albuga.info - Espòrt

Quand los Sapiens fan mai que son possible dins l'esfòrç, quand lo grope fai còrs, laidonc 'rieban de las vertadieras epopèias.
	« Sèm pas venguts aquí per ne'n préner » Titol dels "Contes del rugbí" de Daniel Chavaroche e Jan Bonnefon

Coma un vòl de domaisèlas blúias... carnassièras
Campionat de Rugbí, Federala 2, lo 16 de març de 2008
Albuga / Castèlsarrasin. Marca : 52 a 19

Aquò’s segur ! Se’n sovendràn longtemps las galinetas rojas de Castèlsarrasin de lor passejada al país de las domaisèlas blúias…Dins una fòrma vertadièrament espaventabla e amb qualquaren d’una esquadrilha de caça, l’equipa d’Albuga a mitralhat una seria d’encadènaments a vos copar lo buf per s’envolar darrièr la linha d’en but sièis còps en seguida, daissant l’equipa dels visitors rabiosa mas moqueta. Los d’Albuga tòrnan laidonc, aprèp aquel dimenge memorable, primièrs de lor gropament d’equipa, jos los cants e los orràs de bonaür dels partisans.
Una centena de fotòs restituisson aquela granda partida, relatada minuta per minuta per nòstre eminent confrair PLB.

Coma un gost d'inacabat
Campionat de Rugbí, Federala 2, lo 27 de genier 2008
Albuga / Rodés. Marca: 13 a 13

Aprèp una succession de victòrias – 12 a 9 contra Fumel, 46 a 13 contra Nerac, 20 a 14 contra Malamòrt – e lors cortègis de nafraduras successivas, los jogaires d’Albuga an afrontat l'equipa de Rodés amb belcòp d'absents mas la ràbia al ventre. Aquel rencontre se sòlda per un match nul e mai los Chivalièrs d'Albuga àian un còp de mai balhat la mesura de las ressorças de coratge e de còr incresablas que son capables. Una centena de fotòs vos contan aquela espròva, descrita pas a pas coma totjorn per nòstre confraire PLB.

Revirament de vapor sus lo glaç
Campionat de Rugbí, Federala 2, lo 16 de decembre 2007
Albuga / Sarlat. Marca : 17 a 0

Vaquí, aquò es arribat ièr, sus lo prat enquera un pauc gelat de l’estadi Renaud Cruveiller.
Albuga a vencit Sarlat, çò qu’èra pas arribat dempuèi mai de quaranta ans. Lo vilatge a fait s'enclinar la jos-prefectura, davant un pertèrra d'elegits en mai particularament espés. Que fase caud, que fase freg, òm los arresta pus los d’Albuga. Anèm « Le Bugue », Albuga !

De las macaduras jos la coeta
Campionat Rugbí, Federala 2, lo 2 de decembre 2007
Albuga / Gueret. Marca : 34 a 29

Aquel dimenge 2 de decembre èra un jorn important per lo club d’Albuga que anava veire son illustre jogaire cargat de marcar los còps de pè Antòni Vasquez passar lo relai al jove jogaire Francés Bourgeois. Mas los visitors èran pas venguts per aquò. Las doas equipas se son batudas 84 minutas de temps a un ritme dessenat. Lo bruch enòrme dels placatges ressonan enquera a mas aurelhas. Segurament, i aurà de las macaduras jòs la coeta aquesta setmana, al còr de la Cruesa coma au fin fons del Perigòrd… Per consolar los jogaires, un avant gost de Nadau : un maximum de fotòs d’agachar per veire cadun au mai fòrt de la batèsta.