Son estat bons, los jogaires d’Albuga e de Mauzens Miremont, menats
per lo capitani bombaire, faiçon Spiderman, Joan-Miquèl Loís Rose.
An traversat tota la sason sens una sola desfacha e van laidonc
emplir l'objectiu que s’èran fixats, amb lor president Danièl
Heinen : montar d'una division dins lor district. Jogaràn laidonc
la sason que ven en Segonda Division al nivèl departamental.
Lor darrièra partida, contra Rofinhac lo 13 de mai darrièr, fuguèt sens
apèl : 10 a 1 per lo FCBM, amb sièis buts marcats per Ludovic Bonnet,
lo n°9, e los quatre autres engranjats per Joan-Miquèl Loís Rose,
n°5, Roman Lejeune, n°2, Nicolau Brugière, n°8 et Gwenaël Parat,
n°14. L'equipa a tengut a dedicar aquela darrièra victòria de la sason a
Kevin Audibert, nafrat, que poguèt pas i participar.
L'entraïnaire, Joan-Ives Bonnet, tant coma lo president an felicitat
lo bon èime que fròtja al dedins del grope. An tanben tenguts a
felicitar las femnas dels jogaires, de las suportriças assiduas e
estrambordadas, que contribuan larjament a la motivacion dels jogaires.
Se son rejauvits tanben de l'arribada d'un arbitre internacional
qu’a causit de préner sa retirada a Mauzens Miremont : Pau Burke,
un anglés vengut de West Ham United, que arbitrarà de bon grat,
amb l’engenh que li coneissèm, los rescontres de la sason que ven.
Enfin, per çò que concernís l'escòla de Fotbòl d’Albuga e de Mauzens, Danièl
Heinen a rapelat que se lo torneg dels debutants èra estat un vertadièr
succès, lo 12 de mai darrièr, lo club cèrca totjorn educators
benevòles, que serián al besonh formats amb l'ajuda del club, per fin de
balhar una marca a aquel centre de formacion de jòunes jogaires.
Tota la pichona tropa, president, entraïnaire, arbitre, femnas e
jogaires, s'es tornada trobar a l’escasença d’una serada amicala e vesiada,
ressarrant los ligams d'amistat que son tanben l'una de las rasons d'èsser del FCBM.
Sofia Cattoire
|
