LO MIRACLE DELS CHIVALIÈRS D’ALBUGA

Quala jòia de tornar trobar nòstres chivalièrs d’Albuga, en fin de sason de Federala 1, aprèp aver batalhat de meses coma de lions fàcia a d’equipas vengudas de ranvèrs onte los estatjants se comptan per desenats de milièrs - Albuga : 2700 abitants, l’oblidem pas - nòstres chivalièrs, donc, nòstres eròis, frescs coma de gardons, malins coma de monins e furtius coma de mustelids! Mas arrestem aquí las comparasons, que son jamai rason, e rejauvissèm-nos tot simplament d’aquel brave match avançat al dissabte, jos una subrebèla lutz d’estiu que nos a tots rescalfats e que, de mai, nos a gratifiats d’una victòria quasiment tranquila, jogada aquò’s vrai, mas amb l’eficacitat d’un rotlèu compressor que laissa pauc de plaça als subre-sauts advèrses. Vaquí nòstres chivalièrs en rota per lo match retorn fàcia a l’equipa de Lorda, campiona de França 2008, que a probable enquera qualque miracle a complir. Alara prudéncia e vigilància e d’aquí enlà, vaquí una molonada d’instantanèus del bonaür sul prat coma sol www.albuga.info vos ne’n balha, e per mon arma, sens paguna pretencion, aquò’s brave.

Sofia Cattoire

De jogaires d’Albuga aliant descontraccion e tecnica, tant individuala coma collectiva, e maturitat, an fòrça dominat lo campion de França en titre al cors d’aquel 1/4 de finala anar del campionat de França, se plaçant atal dins las melhoras disposicions per anar a Lorda cercar lor qualificacion per la 1/2 finala. Aprèp un match capitat contra una equipa nauta pirenenca fòrta en cambas, los locals an mostrat l’estenduda de lor engenh amb un « pack » que a fòrça dominat son vis a vis dins la conquista, en mesclada e sul jòc al sòl. Lo fòrt long braç de l’internacional de las islas Fidjí, Langi Peters, permés, en s’espandir de tota son alongada, de marcar lo primièr ensag, precedissent doas autras realisacions non mens remarcablas. Amb tres Lordés que l’acorsavan e aprèp un còp de pè estrategic de Terry Fanuola e una sortida de bala de Maxim Chalon sus regropament, Amedèu Domenech, ancian Lordés, ven aplatir lo balon jos l’en-but e marca lo segond ensag. Lo tresen ensag serà marcat per l’alièr Morgan Souply, fòrt d’una sequéncia de jòc subrebèla orquestrada per Terry Fanolua, internacional de las islas Samoà. Lo pè de Damian Marty e sa velocitat retrobada faràn la rèsta, engranjant tots los autres punts. En fàcia, l’arrièr canonièr lordés Pouey aurà ça que la saugut demorar un dangièr permanent, fasent tot per portar lo jòc dins lo camp local. Cal ajostar una defensa extrèmament eficaça dels Blaus e Blancs, estofant dins l’uòu totas las capacitats de la linha de 3/4 lordèsa, per compréner aquel resultat. Fin finala, 28 a 9 per los d’Albuga. Un subrebèl vèspre de solelh que ne’n apèla d’autres.

PLB