REPRESA DEL ESCAVAMENTS ARQUEOLOGICS
A LA FERRASSIÁ

Sembla que tot lo solelh d’aquel estiu en Perigòrd se siá concentrat sus la represa dels escavaments a La Ferrassiá, jaç preïstoric situat a Savinhac de Miramont. Tanlèu lo trabalh acabat, las pluèjas d'automne – talament esperadas aprèp un printemps demasiadament sec – son arribadas e las temperaturas son tombadas a far tremolar tots los campaires. Mas del 20 de junh al 15 de julhet 2011, aquò’s la calor e la bona imor que an senhorejat sus un sector per lo mens prometor.

REMONTAR LO FIAL DEL TEMPS

En seguida de l’enquèsta menada sus la basa de documents e de fotòs d'archius per l’antropològa Diana Laville per tornar situar l’emplaçament de las set esqueletas neandertalianas descobèrtas aicí al sègle passat, la còla scientifica pluridisciplinària menada per Alan Turq, Haròld Dibble, Dennís Sandgathe, Pau Goldberg e Shannòn Mac Pherron, aviá la sentida qu’una partida del jaç en relacion amb doas de las esqueletas èran probablament demorada intacta. Lo sondatge preliminari menat en junh 2010 anava confirmar aquela ipotèsi. Un an avant, de dosimètres èran estats plaçats jos tèrra per Norbèrt Mercier e Guilhèm Guérin per fin d'enregistrar la radioactivitat naturala ambienta. La primièra mission per 2011 fuguèt donc de los collectar. Gràcia a l'estimacion de la dòsi recebuda, l'atge dels fossils umans poirà lèu èstre etablida. Per aquò far, a boca de nuèit de grans de qüars son estats levats dins de blòts de sediments entièrs. Lo principi : aquels grans de quärs an acumulat dempuèi lor entèrrament – que correspond al moment que los còs son estats els tanben rebonduts – una quantitat de rais gammà que, divisada per la dòsi annuala enregistrada per los dosimètres, balharà lo nombre de milièrs d'annadas dempuèi quand son jos la tèrra. L'energia que aquels grans de qüars an acumulat se libèra al moment que òm los expausa a la lumièra. L'operacion se pratica laidonc dins l'obscuritat, en laboratòri, aquí ont las lumièras mandadas e liberadas, se raportant a diferentas ondas per fin de pas los confondre, pòdon èstre mesurats. D'autres metòdes de datacion seràn utilizats per confrontar aquels resultats. Al final òm saurà lèu pro precisament a quel periòde de nòstra istòria l'òme, la femna e los cinc dròlles de Neandertal, retrobats en posicion sepulcrala, visquèron a La Ferrassiá.

TORNAR TROBAR LOS PAÍSATGES D'ABANS

Dins lo mesma temps, los preïstorians s'esfòrçan de compréner lo biais dont los sediments se son depausats per recobrir una a una las venas arqueologicas que dins aquel jaç representan de naut en bas, coma los cercaires l'esperavan, las grandas culturas preïstoricas nomenadas en omenatge als primièrs luòcs ont fuguèron rencontradas : l'Aurinhacian, lo Chastèlperronian, lo Mosterian de tipe La Ferrassiá e lo Mosterian de tradicion « Acheuléenne ». Aquelas apellacions, lor atge respectiu vertadièr e lor contengut cultural son naturalament al còr d’aquela campanha d’escavaments e las primièras colleccions de frejals talhats e d'òs de faune prelevats joslèvan de questions de natura a far progressar nòstra vision de la situacion al cors de las annadas que venon. L'estudi de las lamas teunas confeccionadas per lo geològ Pau Goldberg en trempant dins de resina de blòts compacts de sediments depausats amb una infinida delicadesa per ren butassar contaràn dins lo mesma temps la natura dels sòls e lo biais que se son constituïts en fonccion de la vita de la Tèrra e de la vita dels òmes. Lo tot permetrà a la fin de reconstituar qualques aspèctes de la vita aicí aquò fai fòrt longtemps. Manca de datacions, per analogias, òm assimilava jusca a ara la pichona populacion de La Ferrassiá als Neandertalians classics (50 000 ans). Saurem a l'orizont 2012 se los grops que an daissat a La Ferrassiá qualques uns de lors mòrts i an pas viscut ben abans e dins un environament plan diferent de lo qu'òm imaginava. De segre.

Sofia Cattoire

Revirada en occitan : Joan-Claudi Dugros