|
Zo cal ben reconéisser, en matèria de rugbí, Albuga fait plan fòrt aquesta rentrada.
Non contents d’aver montat un escalon – jogavan en division Onor l’an passat – Albuga
arriba en Federala 3 amb una audàcia e una qualitat de juòc remirables. Dètz partidas,
dètz victòrias ! E aquò’s pas lo derbí contra Brajairac, aquel dimenge, que li aurà
fait pèrdre sos mejans. Fàcia a una equipa de Brajairac de nauta volada, ofensiva
e determinada, Albuga, qualque pauc distanciat a la debuta del segond temps, a saubut
remontar son andicap amb un juòc que daissèt lo public desalenat puèi embaboquit.
Sus son prat, Albuga èra pas tot-parier vengut per ne’n préner !... Los dos darrièrs
ensags, collectiu a la 59èma minuta e marcat per l’impausant Yassine Ouali a la
72èma minuta, an a mervelha balhat la mesura d’un grope que fait còrs. Aquò’s çò
que lor inculca lo Gèli Bouyssou a l’entraïnament e pòt èstre fièr de sos ensenhaments
fondats sus lo don de se e lo subrepassament. Vejatz al total los quatre subrebèls
ensags d’aquela partida dins nòstres reportatges, valon lo bestorn.
Una causa es segura, la novèla compausicion de l’equipa – un nogal local iper sòudat
mai de las recrutas que se son plan integradas - fait d’Albuga l’un dels mai redobtable
club de vilatge de la Pola 3. Plan fòrt lo que los desquilharà…
|
