|
Lo Perigòrd, tèrra d'aventura
Quò es, coma tots los estius, de la grana d'aventurièrs que lo Perigòrd
Raid Aventura a semenat sus un canton de Dordonha – en l'ocurréncia
en aquel mes d'agost 2012, lo canton de Salanhac e Eivigas – en
organizant la dètz-e-setena edicion d'una fantastica caça al tresaur,
per monts, per vals, per cròsas e per castèls, amb per sol
carburant la fòrça vitala e mentala de 250 joves venguts de França tota,
comprés La Reunion. Quatre jorns d'espròva en VTT,
rolèrs, canoè, tiroliana, pont de singe e corsa a pè, fòra dels
grands axes, a la descobèrta del país de las bòrias, aquelas famosas cabanas
bastidas en lausas que fan tot l'embelinament d'aquel ranvèrs del Perigòrd
negre.
|
|
|
Lo Perigòrd Raid Aventura, un passapòrt per la vita
Coma zo vòl la tradicion, lo relai fuguèt passat entre Remesi
Terrienne, cònsol de Ribérac, e Miquèl Lajugie, cònsol de Sent-Geniés,
lòrs de la session de presentacion del film del Perigòrd Raid Aventura : « Les
Cluzeaux des deux Rivières - Enigme en Ribéracois » realizat per Sofia
Cattoire e produch per FERRASSIE TV, aquel dimars 13 de decembre 2011 al
cinemà Max Linder de Rabairac. L’edicion venenta d’aquela espròva
unica en son genre organizada per lo Servici dels Espòrts del Conselh
General de Dordonha se debanarà en efièch a l’entorn de Sent-Giniés,
dins lo canton de Salanhac-Aivigas, en agost de 2012.
|
|
|
Enfin lo grand film del raid 2010 a Moissídan !
Aprèp Milhac de Nontronh, Montinhac-Las Caus, La Linda, Tortoirac,
Nuòu Vic, La Ròca de Gajac, Ajac de Bandiat, Cujac,
Rofiac, Albuga e Aimet, traversadas de 1999 a 2009, lo Perigòrd
Raid Aventura a fait estapa en agost 2010 a Moissídan. Coma cada
còp, fuguèt la fèsta de l’espòrt e de l'amistat. De notar aquesta annada,
d’equipas particularament ben preparadas e un circuit de raibe, del
castèl de Montreal a Issac al musèu Voulgre de Moissídan, en passar
per Sorzac, Sent Front de Pradon, Sent-Laurenç daus Urmes e
Sent Meard de Moissídan.
|
|
|
Lo babyski rend la diga dinga donc
120 ectaras jos l’aiga per crear un estanh en estat d’asagar los camps de la vau de Dròt, aquò’s l’obratge d’art titanic complit pels òmes a la riba de la Dordonha e de Òlt e Garona, a la debuta de las annadas 90. Dempuèi lo paisatge tira glòria del lac de Lescourou, dotat d’una diga, d’un pont e, sus sa riba sauvatja, d’una resèrva naturala poblada de bernats pescaires. Aquel aqüatic relarg es destinat a l’agricultura e non als lésers. Pr’aquò, gràcia a l’obertura d’esperit dels elegits del País de Duràs e a la fòrça de persuasion de la còla del comitat departamental d’esquí nautic de la Dordonha, lo Babyski Torn a investit las ribas del lac, costat Soumensac, amb la complicitat del cònsol Bernat Patissou, aquel dissabte 12 de junh jos un cèl radiós.
|
|
|
BABYSKI TORN DORDONHA PERIGÒRD 2010
Coma d’ausèls sus l’aiga
L'amarrissatge dels bernats-pescaires, dels canards o de las aucas salvatges, aquò’s
l’esquí a l'estat pur. Aquò’s a quel plaser de la glissa que los
benevòles del Babyski Torn convidan los dròlles de 3 a 10 ans cada
mes de junh dempuèi tres ans. Amb una astúcia per eschivar
l'experiéncia plonjanta de l’arnièr : los esquís son estacats al
batèu e los drollets, ben arrapats a la barra, an tots lo plaser de
surfar coma de campions. Aquò’s gaujós, a gratís e deuriá concernir
tots los mainatges de nòstra brava Dordonha, rica en plans
d'aiga que son tant d'ecosistèmas d'excepcion.
|
|
|
|
|
|
|
Quand los Sapiens fan mai que son possible dins l'esfòrç,
quand lo grope fai còrs, laidonc 'rieban de las vertadieras epopèias.
|
|
|
 |
|
|
|
|
|
|
|
|
|
|
