LO PERIGÒRD RAID AVENTURA
UN PASSAPÒRT PER LA VITA

Coma zo vòl la tradicion, lo relai fuguèt passat entre Remesi Terrienne, cònsol de Ribérac, e Miquèl Lajugie, cònsol de Sent-Geniés, lòrs de la session de presentacion del film del Perigòrd Raid Aventura :« Les Cluzeaux des deux Rivières - Enigme en Ribéracois » realizat per Sofia Cattoire e produch per FERRASSIE TV, aquel dimars 13 de decembre 2011 al cinemà Max Linder de Rabairac.

L’edicion venenta d’aquela espròva unica en son genre organizada per lo Servici dels Espòrts del Conselh General de Dordonha se debanarà en efièch a l’entorn de Sent-Giniés, dins lo canton de Salanhac-Aivigas, en agost de 2012.

Obèrta e ofèrta als joines de 14 a 16 ans de França entièra, aquela caça al tresaur en plena natura scenarizada cada an per Tierrí Félix, reclama fòrça coratge e un bon biais de deduccion e s'impausa coma un moment fòrça important a quel moment decisiu de l'adolescéncia.

Sèm en preséncia, en realitat, d'un vertadièr rite iniciatic, rite de passatge entre l'enfància e l'adolescéncia, quand cadun es apelat a traspassar sas limitas. Un vertadièr passapòrt per l'avenidor d’aquels joines que en mai nos an explicat aver agut glòria e succès en lo botant dins lor CV per postular dins de grandas escòlas.

Dins un monde que l'educacion pòt de còps semblar destinada als ordinators e als jòcs videòs, aquela espròva concrèta que pren las escorcieras e demanda coratge, temeritat e solidaritat, representa l'un dels bastions de la volontat de far passar a las joinas generacions la fòrça e l'enveja de venir de monde coma cal.

Pagun dels raidors podrà oblidar aquela aventura e tots bastiràn lor parcors sus aquel sòcle, ne’n sèm segurs.

Trobaretz lo film d’aquela espròva sul siti del Conselh general de Dordonha e l’ensemble de las fotòs aicí-mesma sus www.albuga.info e tanben lo DVD e lo Blu-Ray que venon de sortir.

Sofia Cattoire