DEFENDRE DE CAÇAR A L'ENTORN DE SON OSTAL, ES POSSIBLE

INTERDIRE LA CHASSE CHEZ SOI, C'EST POSSIBLE BAN HUNTING ON YOUR LAND? YES, YOU CAN!

Compte tengut d'accidents desplasents arribats en França aquelas darrièras annadas – balas perdudas que an mortalament tocat d'automobilistas, de randolejaires o de ribairencs dins lor casal – la tension monta entre los caçaires e los que estiman que deuriá pas i aver de caça a l'entorn de lor ostal. E quò's lor drech. Lo drech de non-caça exista, manca dins tres departaments en Alsàcia-Mosèla, que fan excepcion. Per far valer aquel drech de non caça pertot alhors, conven de ne'n far la demanda per corrièr recomandat amb acusat de recepcion mandat a la Federacion dels Caçaires de vòstre Departament. Lors presidents e lors tecnicians son vòstres interlocutors privilegiats, sauràn vos assabentar e vos acompanhar. Els sols son abilitats a zo far. Anam dins aquel article vos indicar concrètament las demarchas de sègre, son simplas e rapidas.

Tableau de chasse
Tableau de chasse

Las bonas questions que cal se pausar per començar :

  1. I a una balheta de caça anciana que contunha de s'aplicar sens que zo sàpia sus ma proprietat ?
  2. Ma proprietat fa partida d'una ACCA, Associacion Comunala de Caça Acceptada (Association Communale de Chasse Agrée) ?
  3. Me tròbi dins los departaments de Mosèla, de Naut Ren o de Bas Ren ?
  4. Ma proprietat es pas grevada per de vièlhas balhetas e es pas o pus dins una ACCA. Devi çaquelà far valer mon drech de non caça ?

Aprèp una enquista jornalistica furgada, pòdi vos afortir que dins tots los cas, de las solucions existan per defendre de caçar a l'entorn de vòstre ostal. Anam tornar préner punt per punt las prumièras questions que se cal pausar eficaçament, se vos plai.

1 / I a una balheta de caça anciana que contunha de s'exerçar sens que lo sàpia sus ma proprietat ?

COMA RETROBAR UNA BALHETA DE CAÇA ANCIANA ?

Cal ben compréner que a priòri, en França, tota proprietat privada dispausa d'un drech de caça que li es associat. Pr'aquò, aquel drech es pas sistematicament detengut per lo proprietari el meteis, e mai se aquel d'aquí zo crei, en tota bona fe.

En realitat dins nòstre campèstre, nombrós terrens son integrats dins de balhetas de caça ancianas, e mai fòrt ancianas, passadas amb de precedents proprietaris. Mas, se al moment ont la proprietat es crompada, dels diagnostics tocant l'amiante, lo plomb o las formigas blancas son ben exigits, l'acte de venda notarial estipula per ben dire jamai l'existéncia d'una balheta de caça anterior, alara qu'aquel tipe de contrat a la particularitat de se persègre quitament aprèp mai d'un cambiament de proprietaris. En clar, aquela balheta de caça contunharà de córrer juscas a çò qu'un proprietari que voldriá far valer son drech de non caça ne'n descobrisse l'existéncia e entreprenguèsse las demarchas necessàrias per l'annular, dins l'intencion de defendre d'ara enavant de caçar sus sa proprietat. Aquò foncciona tanben per un proprietari caçaire que vòl recuperar son drech de caça per son pròpre usatge. Manca que, entre caçaires, las vièlhas balhetas son mielhs conegudas.

En resumit :

La balheta de caça s'escantís pas amb lo cambiament de proprietari, demòra valabla juscas a son annulacion oficiala pel novèl proprietari. Quò es la causa de fòrça mespresas. Per exemple, un proprietari s'emociona en veire un grope de caçaires regularament caçar sus son terren, mentre que els son dins lor bon drech, dins la mesura que las pèças en question son estadas autres còps « signadas », segon l'expression consacrada, per un ancian proprietari al profièch de lor associacion. Per gardar aquela balheta de caça, los caçaires seràn gaire tentats de l'invocar, pr'amor qu'aquela-d'aquí risca pas d'èsser resiliada. Aquela opacitat deu èsser avalida per vos meteis, dins los melhors delais.

2 / Ma proprietat fa partida d'una ACCA, Associacion Comunala de Caça Acceptada ?

DEMPUÈI lo 29 d'abrial de 1999, CADUN PÒT TRAIRE SOS TERRENS D'UNA ACCA

L'existéncia d'una ACCA vòl dire que 60 % dels proprietaris que an al mens 60 % de las tèrras se sont botats d'acòrd per qu'aquela associacion de caça comunala aja una existéncia e s'autreja lo drech de caçar sus l'integralitat de vòstra comuna. De notar que las Associacions Comunalas de Caça Acceptadas fan respectar una distància de securitat apreciabla, la caça i pòt s'exerçar a mens de 150 mètras de las abitacions, règla que exista pas en defòra de las ACCA.
Los caçaires e los non caçaires pòdon, dempuèi lo 29 d'abrial 1999, escartar lors terrens de las ACCA, los uns per i caçar sols, los autres per que degun i cace. I a laidonc doas formulas distinctas.

L'oposicion territoriala es destinada als proprietaris caçaires

Se un proprietari foncièr vòl recuperar son drech de caça per son pròpre usatge, alara que sa proprietat es inscrita dans lo territòri d'una ACCA, deu aver un nombre minimum d'ectaras, segon l'espècia caçada. Per exemple en Dordonha, aquel caçaire deu aver al mens 20 ectaras d'una sola pèça per la caça a la granda salvatgina. Quò es çò qu'apelan una « oposicion territoriala » a l'ACCA.

L'oposition de consciéncia es destinada als proprietaris non caçaires

Se sètz pas caçaire e que volètz tirar vòstras pèças de tèrras del territòri de caça d'una ACCA, zo podètz far dins tots los cas, quala que siá la superficia de vòstras pèças de tèrra. Quò es çò qu'apelan una « oposicion de consciéncia », vos engatja a pas caçar e a pas deténer de permés de caça. Aquel drech resulta d'un arrèst de la Cort europenca dels Drechs de l'Òme datat del 29 d'abrial de 1999, l'arrèst Chassagnou, que a modifiat la legislacion francesa concernent lo drech de caça. Dempuèi aquel moment, los proprietaris que los terrens èran juscas alara somés al drech de caça d'una associacion de caça que podián pas se'n tirar, benefician d'una possibilitat d'oposicion. De vrai, jauvisson d'un drech de retrait de lors pèças de tèrra per “conviccions personalas oposadas a la practica de la caça”. Quò es çò qu'apelan una una « oposition de consciéncia », a pas besonh de pas cap de justificacion complementària.

Podètz consultar l'arrèst que modifica l'inclusion forçada dels terrens dans lo perimètre de la caça e l'adesion obligatòria dels proprietaris contra lo grat a l'associacion de caça, en sègre aquel ligam :

juridique.defenseurdesdroits.fr

ARRÊT RELATIF À L'INCLUSION FORCÉE DES TERRAINS DANS LE PERIMÈTRE DE LA CHASSE ET L'ADHÉSION OBLIGATOIRE DES PROPRIÉTAIRES CONTRE LEUR GRÉ À L'ASSOCIATION DE CHASSE : CHASSAGNOU ET AUTRES C. FRANCE

En resumit :

Es jamai impossible de sortir d'una ACCA. Los proprietaris caçaires que vòlon caçar els quitament chas els coneisson ben las règlas del jòc en terme de superficias minimalas, que varian segon las espècias caçadas. Los non caçaires pòdon els tanben, dempuèi l'arrèst Chassagnou del 29 d'abrial de 1999, tirar lors pèças de tèrra de l'ACCA que exista sus lor comuna, en far valer lor oposicion de consciéncia, qu'an brica besonh de justifiar.

3/ Sei situat dins los departaments de de Mosèla, de Naut Ren o de Bas Ren ?

EN ALSÀCIA-MOSÈLA, L'OPOSICION DE CONSCIÉNCIA ES PAS RECONEGUDA

Exista enquera en França, dins Alsàcia-Mosèla, es a dire precisament dins los departaments de Mosèla, de Naut Ren o de Bas Ren ?, una legislacion especifica regida per lo Regime del Concordat, eissit del restacament d'aquels territòris a l'Empèri alemand en 1870. Dins aquels departaments, la caça es permesa pertot e administrada per las comunas per lo compte dels proprietaris, segon l'article L429-2 e seguents del Còdi de l'Environament.

Vos podètz assabentar d'un biais precís sus aquel article L429-2 tocant lo drech de caça, sus las tèrras e sus los espacis cobèrts d'aiga administrats per la comuna, al nom e per lo compte dels proprietaris, en sègre aquel ligam :

www.circulaires.gouv.fr

Droit national en vigueur / Codes / Code de l'environnement / Section 1 : Administration de la chasse sur le ban communal (Articles L429-2 à L429-18)

Pr'aquò, se aquí enquera, un proprietari caçaire se pòt tirar d'aquel dispositiu a condicion d'aver de las superficias de pèças de tèrra demandadas segon las espècias caçadas, al contrari, un proprietari non caçaire podrá pas evitar la caça, manca de barrar l'integralitat del perimètre de sas pèças de tèrra, segon las exigéncias rigorosas previstas per l'article L424-3 del còdi de l'environament. « Un mur o una cledissa continua fará alara ofici d'obstacle al passatge dels caçaires e de la salvatgina amb pials ». Aquò pòt representar un gròs budget. Per autant, aquela solucion de barradura es a l'ora d'ara lo sol biais de defendre de caçar chas se en Alsàcia-Mosèla, l'oposicion de consciéncia i es pas enquera reconeguda.

En résumit :

Fòra en Alsàcia-Mosèla, la primièra causa de far quand avètz idèa de crompar en France una proprietat, o quand, un còp crompada, i volètz defendre de caçar, quò es de ben vos assabentar sus l'existéncia o non d'una balheta de caça anteriora e sur la preséncia o non d'una ACCA sus la comuna concernada. Lo mai lèu es lo melhor que la demanda d'annulacion d'una balheta de caça deu intervenir sièis mes avant sa data aniversària, manca a tornar partir per una, doas, e mai tres annadas, segon la durada iniciala precisada per aquel tipe de contrat. Per çò qu'es de las ACCA, son soscritas per cinc ans, çò que en cas de demanda tombant a mens de sièis mes de la reconduccion poirá vos semblar long.

4/ Ma proprietat es pas grevada per de vièlhas balhetas e es pas o pus dins una ACCA. Devi pasmens far valer mon drech de non caça ?

PER PRECAUCION, ES DE PREFERAR D'EXPRIMAR VÒSTRA OPOSICION A LA CAÇA

MQuitament se, a priòri sens balheta de caça ni ACCA e en prenent la seguida d'un proprietari que aviá fait valer son drech de non caça sus las tèrras que venètz de crompar, pensatz qu'aquel estatut vai d'el-meteis s'esperlongar, val mai contactar la Federacion dels Caçaires de vòstre Departament per assolidar vòstra volontat de veire se perseguir l'interdiccion de caça a l'entorn de vòstre ostal. Per çò que semblariá qu'una ACCA podriá al cap de sièis mes sens intervencion de vòstra part, considerar que vòstras tèrras sont tornadas dins son sen. La discussion, la comunicacion, amb la Federacion dels Caçaires de vòstre Departament son, d'aquel biais, totjorn la melhora solucion.

VÒSTRE INTERLOCUTOR PRIVILEGIAT DINS TOTS LOS CAS PER VOS DOCUMENTAR E AFIRMAR VÒSTRAS CAUSIDAS : LA FEDERACION DELS CAÇAIRES DE VÒSTRE DEPARTAMENT

Se de per abans lo Prefect e las Direccions departamentalas dels Territòris (DDT) èran partidas prenentas, la gestion de las demandas d'obtencion del drech de non caça es d'ara enavant plaçada jos l'autoritat exclusiva de las Federacions Departamentalas dels Caçaires. Per saber, en amont, s'exista una balheta de caça o una ACCA concernent vòstra proprietat, vos cal alara contactar la Federacion dels Caçaires de vòstre Departament, per exemple la FDC24 per la Dordonha. Son aquelas Federacions de Caçaires que an l'integralitat dels arquius, donc la traça de totas las balhetas de caça, ancians tant coma recents, e la lista dels ACCA.

Los departaments son decopats en sectors, cada sector dispausa d'un tecnician que coneis perfectament los territòris de caça e lor reparticion. Tant val lo júnher en prioritat, en demandant son nom e son telefòn al estandard. De còps, de documents telecargables sus Internet vos permetrán tanben de l'identifiar. Sul site web de la Federacion dels Caçaires de Dordonha, per exemple : chasseurs24.com trobaretz las coordenadas del tecnician de vòstre sector sus de cartas en pdf coma aquela-d'aquí :

Carte de répartition des secteurs techniques FDC24
Carte de répartition des secteurs techniques FDC24

Botar aquí lo ligam per telecargar las cartas amb las coordenadas dels tecnicians : Carte-de-répartition-des-secteurs-techniques.pdf

Veire lo pdf : Carte-de-repartition-des-secteurs-techniques.pdf

Vos conselhi d'establir un contact dirèct per telefòn al prèp del tecnician concernit, seretz segur assabentats amb cortesiá e eficacitat.

En fonccion de las responsas de la Federacion dels Caçaires de vòstre Departament, doas possibilitats se pòdon presentar :

I / Exista una balheta de caça anciana sus tot o partida de vòstra proprietat, soscrit amb una societa de caça ara identifiada.

II / Vòstra proprietat fa partida d'una ACCA, associacion comunala de caça acceptada, que intègra per definicion tota vòstra comuna.

I/ Primièr cas, coma annular una anciana balheta de caça totjorn en activitat ?

Se la Federacion dels Caçaires de vòstre Departament vos infòrma del fach qu'una balheta de caça exista realament sus tot o partida de vòstra proprietat, aquò's simple. Vos cal ne demandar una còpia per corrièl o per corrièr postal, per ben identifiar lo que a la balheta en question perfin de poder realizar son annulacion.

Per aquò far, vos cal preparar dos corrièrs, corts e clars, que mandaretz en recomandat amb acusat de recepcion :

  • Lo primièr a la Societat de caça que ten la balheta anciana per li expausar vòstra volontat d'annular aquela balheta en cors e vòstra volontat de defendre, a partir de la data efectiva d'aquela annulacion, tot acte de caça sus vòstras pèças de tèrra
    Objècte : annulacion de la balheta de caça anciana e defensa de la caça sus l'ensemble de mas pèças de tèrra en vertut de mon oposicion de consciéncia
    Objet : annulation du bail de chasse ancien et interdiction de la chasse sur l'ensemble de mes parcelles en vertu de mon opposition de conscience

    Amb en pèças juntas dos documents que podètz retirar en Merariá a gratís :
  • un inventari de vòstras pèças de tèrra cadastralas que ne'n establís la lista
  • un plan de cadastre ont figuran vòstras pèças de tèrra.
  • Lo segond a la Federacion dels Caçaires de vòstre Departament per cancellar aquela anciana balheta e establir la defensa de caçar sus totas vòstras pèças de tèrra
    Objècte : annulacion de la balheta de caça anciana e defensa de la caça sus l'ensemble de mas pèças de tèrra en vertut de mon oposicion de consciéncia
    Objet : annulation du bail de chasse ancien et interdiction de la chasse sur l'ensemble de mes parcelles en vertu de mon opposition de conscience

    Amb en pèças juntas aquels meteis documents que podètz retirar en Merariá a gratís :
  • un inventari de vòstras pèças de tèrra cadastralas que ne'n establís la lista
  • un plan de cadastre ont figuran vòstras pèças de tèrra.
  • Mai una còpia mandada a la Sociétat que deten l'anciana balheta de caça.

II / Segond cas, coma sortir vòstras pèças de tèrra d'una ACCA ?

Se sètz pas caçaire e volètz sortir vòstras pèças de tèrra d'una ACCA, Associacion Comunala de Caça Acceptada, es sufisent de far conéisser vòstra oposicion de consciéncia.
Tal serà donc l'objècte del corrièr en recomandat amb acusat de recepcion que mandaretz a la Federacion dels Caçaires de vòstre Departament, que enregistra e administra las ACCA.

  • Objet : Volontat de sortir mas pèças de tèrra en vertut de mon oposicion de consciéncia
    Objet : Volonté d'extraire mes parcelles de l'ACCA en vertu de mon opposition de conscience

    Amb en pèças juntas totjorn aquels dos documents que podètz retirar en Merariá a gratís :
  • un inventari de vòstras pèças de tèrra cadastralas que ne'n establís la lista
  • un plan de cadastre ont figuran vòstras pèças de tèrra.

La Federacion dels caçaires dispausa d'un delai de 4 mes per vos desliurar l'atestacion que precisa plan que vòstre terren es sortit de la zòna de caça concernida per l'ACCA.

Per rendre legibla e visibla sul terren vòstra defensa de caçar, vos cal enfin dispausar tot a l'entorn de vòstra proprietat de panèls ont serà inscrit la mencion seguenta :

PROPRIETAT PRIVADA, CAÇA DEFENDUDA

Tre que la defensa de caçar demandada serà obtenguda per retorn de corrièr de la Federacion dels Caçaires de vòstre Departament, vos caldrà installar de placas de senhalizacion « Proprietat privada, Caça defenduda » visible tot alentorn de vòstra proprietat, valent a dire que quand òm vei una placa, cal que se pòsca veire la seguenta.

En conclusion, la caça, es coma lo don d'organe, sètz présumit èsser d'acòrd manca s'avètz clarament precisat vòstra oposicion. Sus un formulari d'inscripcion al registre nacional dels refús, se sètz oposat al prelèvament d'elements de vòstre còrs après la mòrt, e sus un corrièr RAC mandat a la Federacion dels Caçaires de vòstre Departament, se sètz oposat a la caça a l'entorn de vòstre ostal.

Coma l'auretz comprés en legissent aquel article, tant una balheta de caça istorica se pòt esperlongar sens téner compte dels cambiaments de proprietaris, tant l'exercici efectiu d'un drech d'oposicion a la caça, obtengut segon los metòdes explicitats dins aquel article, subreviu pas mai de sièis mes au cambiament de proprietari. Aquò vòl dire, clarament, que se vendètz vòstre ben a una persona que vòl que la caça contunhe de pas s'i practicar, li caldrà necessariament renovelar sa demanda d'aquel biais prèp de la Federacion dels Caçaires de son Departament. Fauta de que, lo drech de caça sus aquela proprietat podriá tornar èsser efectiu sens que zo saupèssetz, sièis mes aprèp la venda.

Lo consentament del proprietari que accepta la caça sus son terren es en efièch, per la fòrça d'abitudas duradissas, tacite en França en cas de siléncia. Çò qu'es en totala contradiccion amb l'evolucion del còdi de l'environament que definís uèi « la caça sus la gent sens son consentament » coma una malafacha passible d'esmendes e de penas d'empresonament, variables en fonccion de las circonstàncias. Ne'n vaquí un cort extrait :

Article L428-1

Modifié par Ordonnance n°2000-916 du 19 septembre 2000 - art. 3 (V) JORF 22 septembre 2000 en vigueur le 1er janvier 2002

Est puni de trois mois d'emprisonnement et d'une amende de 3 750 euros le fait de chasser sur le terrain d'autrui sans son consentement, si ce terrain est attenant à une maison habitée ou servant à l'habitation, et s'il est entouré d'une clôture continue faisant obstacle à toute communication avec les héritages voisins.

Si le délit est commis pendant la nuit, la peine d'emprisonnement encourue est de deux ans.

Article L428-1

Modifiat per Ordenança n°2000-916 del 19 de setembre de 2000 - art. 3 (V) JORF 22 de setembre de 2000 en aplicacion lo 1er de genièr de 2002

Es punit de tres mes d'empresonament e d'una esmenda de 3 750 èuro lo fach de caçar sul terren de la gent sens son consentament, se aquel terren es atenent a un ostal abitat o que serv per l'abitacion, e s'es entorat d'una barradura continua que fa obstacle tota comunicacion amb los eretatges vesins.

Se lo delicte se passa pendent la nuèch, la pena d'empresonament encorreguda es de dos ans.

Mention d'avertissement Attention ! Les traductions du droit français consultables sur le site Légifrance sont dépourvues de valeur légale : elles ont une simple portée informative. Seule la version française des textes paraissant au Journal officiel de la République française fait foi.

Per conéisser l'ensemble dels articles del Còdi de l'environament que regisson la caça, vos sufís d'anar sul site de Légifrance en segre aquel ligam :

www.circulaires.gouv.fr

Droit national en vigueur / Codes / Code de l'environnement / Chapitre VIII : Dispositions pénales (Articles L428-1 à L428-29)

Sèm atal en França dins una situacion que la caça sembla possibla pertot, manca se avètz balhat una oposicion oficiala. A l'encòp, la lei explica que la caça sus la gent sens son consentament, donc a vòstre ostal sens vòstre acòrd, es defenduda. Question : ren dire val consentement ? Vos laissi soscar aquí dessús, amb una certituda e un sol conselh, siatz clar e exprimatz vòstras causidas a qui de drech, tot simplament.

Enfin, rapelatz-vos que la caça a la granda salvatgina, per çò que concerna lo Perigòrd de tota manièra, tòrna començar al 15 d'agost que ven. Fasètz vòstras formalitats tre aquel printemps se volètz obténer la presa en compte de la defensa de caçar a l'entorn de vòstre ostal, corrièr oficial que la Federacion dels Caçaires de vòstre Departament deu vos tornar al pus tard 4 mes aprèp vòstra demanda.

Enfin vos cal saber que se, malgrat tot, sètz confrontats a un acte de caça a l'entorn de vòstre ostal, donc sus la gent sens son consentament, aquò's la gendarmariá al 112 que vos caldrà sonar per que l'infraccion siá constatada.

Sofia Cattoire
jornalista grand reporter

Revirada en occitan :
Joan-Claudi Dugros
majoral del Felibrige e corrector al Collègi d’Occitania de Tolosa

Annonces